ఎర్రవల్లిలో 45 ఎకరాల భూముల ఆచూకీపై సర్వేకు ఆదేశం

సిద్దిపేట: మర్కూక్ మండలం ఎర్రవల్లి, శివారు వెంకటాపురం గ్రామాల పరిధిలో రికార్డుల్లో ఉన్నప్పటికీ ఆచూకీ లభించని 45 ఎకరాల భూములపై సమగ్ర సర్వే నిర్వహించేందుకు నోటిఫికేషన్ జారీ చేయాలని ముఖ్యమంత్రి ఎ. రేవంత్ రెడ్డి అధికారులను ఆదేశించారు.

ఈ భూములకు సంబంధించిన అంశంపై గత నెల 16న శాసనసభలో జరిగిన చర్చ సందర్భంగా ముఖ్యమంత్రి విచారణకు ఆదేశించారు. విచారణ పురోగతిపై ఎంసీఆర్ హెచ్‌ఆర్‌డీలో నిర్వహించిన సమీక్షలో అధికారులు వివరాలను వెల్లడించారు.

అధికారుల వివరాల ప్రకారం.. ఎర్రవల్లి గ్రామ పరిధిలోని సర్వే నంబర్ 325లో మొత్తం 388 ఎకరాల భూమి ఉన్నట్లు ప్రభుత్వ రికార్డుల్లో నమోదై ఉంది. అయితే ఇటీవల నిర్వహించిన సర్వేలో 343 ఎకరాలు మాత్రమే గుర్తించినట్లు అధికారులు తెలిపారు. దీంతో రికార్డుల్లో ఉన్న భూమికి, క్షేత్రస్థాయిలో గుర్తించిన భూమికి మధ్య 45 ఎకరాల వ్యత్యాసం ఉన్నట్లు వెల్లడించారు.

కేసీఆర్ కుటుంబ భూముల రికార్డులు కోరనున్న అధికారులు

సర్వే నంబర్ 325కు సమీపంలో మాజీ ముఖ్యమంత్రి కల్వకుంట్ల చంద్రశేఖర్ రావు, ఆయన కుటుంబ సభ్యులకు సంబంధించిన భూములు ఉన్నందున వాటి రికార్డులను సమర్పించాలని నోటీసులు జారీ చేయనున్నట్లు అధికారులు సమీక్షలో తెలిపారు.

45 ఎకరాల భూమి ఎక్కడ ఉందనే అంశాన్ని తేల్చేందుకు ఎర్రవల్లి, వెంకటాపురం గ్రామాల పరిధిలో సర్వే నిర్వహించాలని ముఖ్యమంత్రి ఆదేశించారు.

అర్హులైన రైతులకు భూముల పంపిణీ

సర్వేలో ప్రభుత్వ భూమిగా గుర్తించే భూమిని స్థానికంగా అర్హత ఉన్న రైతులకు పంపిణీ చేసేలా చర్యలు తీసుకోవాలని ముఖ్యమంత్రి సూచించారు. తెలంగాణ ఉద్యమంలో అమరులైన వారి కుటుంబాల కోసం ప్రత్యేకంగా ‘తెలంగాణ అమరవీరుల కాలనీ’ నిర్మించాలని ఆదేశించారు.

అమరవీరుల కుటుంబాలకు ఇళ్ల స్థలాలు కేటాయించడంతో పాటు, అవసరమైన మౌలిక సదుపాయాలతో కాలనీని అభివృద్ధి చేయాలని సూచించారు. నిర్మాణ బాధ్యతలను గృహ నిర్మాణ శాఖకు అప్పగించాలని, వచ్చే జూన్ 2లోగా కాలనీ నిర్మాణం పూర్తయ్యేలా చర్యలు చేపట్టాలని అధికారులను ఆదేశించారు.

వెలికట్టలో ఎడ్యుకేషన్ హబ్

కొండపాక మండలం వెలికట్ట గ్రామ పరిధిలో అసైన్డ్ భూములు, మిషన్ భగీరథకు కేటాయించిన భూములను మినహాయించి మిగిలిన భూముల్లో **యంగ్ ఇండియా ఇంటిగ్రేటెడ్ స్కూల్ (YIIRS)**తో పాటు ఎడ్యుకేషన్ హబ్ ఏర్పాటు చేసే అవకాశాలను పరిశీలించాలని ముఖ్యమంత్రి సూచించారు.

నీటి వినియోగంపై అప్రమత్తంగా ఉండాలి

ఎల్‌నినో ప్రభావం నేపథ్యంలో రిజర్వాయర్లు, చెరువుల్లోని నీటిని జాగ్రత్తగా వినియోగించాలని అధికారులకు ముఖ్యమంత్రి సూచించారు. మల్లన్నసాగర్ నీటిని అనధికారికంగా వినియోగిస్తున్న వారిని గుర్తించి, నిబంధనల ప్రకారం చర్యలు తీసుకోవాలని ఆదేశించారు.

ఈ సమీక్షలో ప్రభుత్వ ప్రధాన కార్యదర్శి సంజయ్ జాజు, సీఎంవో ముఖ్య కార్యదర్శి శేషాద్రి, భూ అక్రమాలపై విచారణకు ఏర్పాటు చేసిన కమిటీ, ధరణి అంశాలపై విచారణ కమిటీ సభ్యులు పాల్గొన్నారు.