ప్రధాన ఆసుపత్రుల నిర్మాణ పనుల్లో వేగం పెంచాలి: సీఎం రేవంత్ రెడ్డి..
హైదరాబాద్: ఉస్మానియా ఆసుపత్రి, వరంగల్ సూపర్ స్పెషాలిటీ ఆసుపత్రి, ఎల్బీనగర్, అల్వాల్ టిమ్స్ ఆసుపత్రుల నిర్మాణ పనుల్లో వేగం పెంచాలని ముఖ్యమంత్రి ఎ. రేవంత్ రెడ్డి అధికారులను ఆదేశించారు. ఆసుపత్రుల నిర్మాణం పూర్తయ్యే నాటికి వైద్యులు, నర్సింగ్, ఇతర సిబ్బంది కొరత లేకుండా అవసరమైన నియామక ప్రక్రియను ప్రారంభించాలని సూచించారు.
జూబ్లీహిల్స్‌లోని తన నివాసంలో సీఎంవో అధికారులతో నిర్వహించిన సమావేశంలో రాష్ట్రంలోని విద్య, వైద్య రంగాల క్షేత్రస్థాయి పరిస్థితులు, నిర్మాణంలో ఉన్న ప్రధాన ఆసుపత్రుల పురోగతిపై ముఖ్యమంత్రి సమీక్షించారు.
ఆసుపత్రుల నిర్మాణం పూర్తయ్యే సమయానికి అవసరమైన అత్యాధునిక వైద్య పరికరాలను అందుబాటులోకి తీసుకురావాలని, అన్ని రకాల వైద్య సేవలు అందించేలా ముందస్తు ప్రణాళిక రూపొందించాలని అధికారులను ఆదేశించారు. సిబ్బంది నియామకాల విషయంలోనూ అవసరాలను ముందుగానే గుర్తించి చర్యలు తీసుకోవాలని ప్రభుత్వ ప్రధాన కార్యదర్శికి సూచించారు.
క్షేత్రస్థాయి పర్యటనలకు కలెక్టర్లు
జిల్లా కలెక్టర్లు క్షేత్రస్థాయిలో పర్యటించి ప్రభుత్వ పాఠశాలలు, సాంఘిక సంక్షేమ హాస్టళ్లు, ఆసుపత్రులను విధిగా సందర్శించేలా చూడాలని సీఎం ఆదేశించారు. జిల్లా స్థాయిలో ప్రతి వారం విద్య, వైద్య రంగాలపై సమీక్ష నిర్వహించాలని సూచించారు.
సీజనల్ వ్యాధుల విషయంలో అప్రమత్తంగా ఉండాలని, పాఠశాలల్లో అవసరమైన చోట మరమ్మతు పనులు చేపట్టాలని అధికారులకు తెలిపారు.
ఇన్వెస్ట్ తెలంగాణ గ్లోబల్ సమ్మిట్‌పై చర్చ
డిసెంబరులో భారత్ ఫ్యూచర్ సిటీలో నిర్వహించనున్న ఇన్వెస్ట్ తెలంగాణ గ్లోబల్ సమ్మిట్ ఏర్పాట్లపైనా సమావేశంలో చర్చించారు. సమ్మిట్‌కు సంబంధించిన ఏర్పాట్లు, అతిథుల ఆహ్వానం, పెట్టుబడుల సమీకరణకు సంబంధించిన అంశాలపై పకడ్బందీగా ప్రణాళికలు సిద్ధం చేయాలని సీఎం సూచించారు. త్వరలోనే సమ్మిట్ ఏర్పాట్లను స్వయంగా పరిశీలిస్తానని తెలిపారు.
సమావేశంలో ఎంపీ వేం నరేందర్ రెడ్డి, ప్రభుత్వ సలహాదారు కె. రామకృష్ణారావు, ప్రభుత్వ ప్రధాన కార్యదర్శి సంజయ్ జాజు, రాష్ట్ర డీజీపీ సీవీ ఆనంద్‌తో పాటు సీఎంవో ఉన్నతాధికారులు పాల్గొన్నారు.
