ఆధార్‌లో పేరు మార్పునకు కొత్త నిబంధనలు.. ఏ మార్పుకు ఏ పత్రం అవసరమంటే?
న్యూఢిల్లీ: ఆధార్ కార్డులో పేరు సవరణలు, మార్పులకు సంబంధించి యూనిక్ ఐడెంటిఫికేషన్ అథారిటీ ఆఫ్ ఇండియా (UIDAI) కొత్త విధానాన్ని అమల్లోకి తీసుకొచ్చింది. పేరు మార్పు స్వభావాన్ని బట్టి అవసరమైన పత్రాలు, అఫిడవిట్లను వేర్వేరుగా సమర్పించాల్సి ఉంటుంది. సెప్టెంబర్ 18, 2026న జారీ చేసిన కొత్త స్టాండర్డ్ ఆపరేటింగ్ ప్రొసీజర్ (SOP)తో గతంలో అమల్లో ఉన్న విధానంలో మార్పులు చేశారు.
చిన్నపాటి సవరణలకు గుర్తింపు పత్రం
పేరు ఉచ్చారణలో పెద్దగా మార్పు లేకుండా స్పెల్లింగ్ సవరణ, ఇనిషియల్స్‌ను పూర్తి పేరుగా మార్చడం, మధ్య పేరు లేదా ఇంటిపేరు చేర్చడం/తొలగించడం, పేర్ల క్రమాన్ని మార్చడం వంటి వాటిని మైనర్ నేమ్ చేంజ్‌గా పరిగణిస్తారు. ఇలాంటి సందర్భాల్లో సంబంధిత గుర్తింపు పత్రం (PoI) సమర్పించాల్సి ఉంటుంది.
డేటా ఎంట్రీ తప్పిదమైతే అఫిడవిట్
ఆధార్ నమోదు సమయంలో సిబ్బంది చేసిన డేటా ఎంట్రీ పొరపాటు కారణంగా పేరు తప్పుగా నమోదై ఉంటే ప్రత్యేక నిబంధనలు వర్తిస్తాయి. పెద్దలకు Annexure-B అఫిడవిట్‌తో పాటు అవసరమైన గుర్తింపు లేదా సంబంధిత పత్రం సమర్పించాలి. మైనర్ల విషయంలో తల్లిదండ్రులు లేదా చట్టబద్ధమైన సంరక్షకులు Annexure-C అఫిడవిట్ సమర్పించాల్సి ఉంటుంది. ఆధార్‌లో కోరుతున్న పేరు గతంలో సమర్పించిన పత్రంలోని సరైన పేరుతో సరిపోవాలి.
వివాహం లేదా విడాకుల తర్వాత ఇంటిపేరు మార్పు
వివాహం లేదా విడాకుల కారణంగా ఇంటిపేరు మార్చుకోవాలనుకునే వారికి ప్రత్యేక విధానం ఉంది. Annexure-D అఫిడవిట్‌తో పాటు గుర్తింపు పత్రాన్ని సమర్పించాల్సి ఉంటుంది. అవసరమైన సందర్భాల్లో రిజిస్టర్డ్ మ్యారేజ్ సర్టిఫికెట్‌ను కూడా ఆధారంగా చూపవచ్చు.
కొన్ని సవరణలకు పత్రాలు అవసరం లేదు
పేరులో అక్షరాల క్యాపిటలైజేషన్‌ను సరిచేయడం, ఉదాహరణకు “RaMesh”ను “Ramesh”గా మార్చడం, పేరులోని డాట్లను తొలగించడం వంటి కొన్ని సవరణలకు ప్రత్యేక పత్రం అవసరం లేదని UIDAI పేర్కొంది. అయితే పేర్లలో అనవసరమైన బిరుదులు, హోదాలు, సైనిక ర్యాంకులు, అలియాస్ వంటి వాటి నమోదుపై ప్రత్యేక నిబంధనలు ఉన్నాయి.
పూర్తి పేరు మార్చాలంటే గెజిట్ తప్పనిసరి
ఒక వ్యక్తి పేరును పూర్తిగా మార్చడం లేదా పేరు మార్పుతో వ్యక్తిత్వమే మారినట్లు కనిపించే సందర్భాలను Major Name Changeగా పరిగణిస్తారు. ఇలాంటి సందర్భాల్లో గెజిట్ నోటిఫికేషన్‌తో పాటు అవసరమైన గుర్తింపు పత్రాలను సమర్పించాల్సి ఉంటుంది. సమర్పించిన పత్రాలు, అఫిడవిట్లు, గెజిట్ నోటిఫికేషన్‌లను UIDAI అధికారులు పరిశీలించిన తర్వాతే అభ్యర్థనను ప్రాసెస్ చేస్తారు.
ఆధార్ కేంద్రంలోనే పేరు మార్పు
ప్రస్తుతం పేరు మార్పు లేదా సవరణ కోసం ఆధార్ ఎన్రోల్మెంట్/అప్‌డేట్ సెంటర్‌ను ఆశ్రయించాల్సి ఉంటుంది. మార్పు స్వభావాన్ని బట్టి సరైన ఒరిజినల్ పత్రాలను తీసుకెళ్లడం అవసరం.
గమనిక: పేరు మార్పు ఏ రకానికి చెందుతుందో బట్టి పత్రాల అవసరం మారవచ్చు. అందువల్ల ఆధార్ కేంద్రాన్ని సందర్శించే ముందు UIDAI తాజా మార్గదర్శకాలను పరిశీలించడం మంచిది.
